प्यूठान । जन्मिँदै ओठ तथा तालु (जिब्राे भन्दामाथि) फाटेका सात जना बालबालिकाको निःशुल्क उपचार गरिने भएको छ । जिल्लाका विभिन्न ठाउँमा छनाेट शिविर मार्फत छ्नौट भएका ती बालबालिकाको नि:शुल्क प्लास्टिक सर्जरी (शल्यक्रिया) गरिने भएको हो ।

बि एन्ड बि अस्पतालको आयोजना, राष्ट्रिय अपाङ्ग सेवा सङ्घ प्युठानको सह–आयोजना तथा सामाजिक विकास डिभिजन कार्यालय प्युठानको समन्वयमा चार वटा पालिकामा छनाेट शिविर सम्पन्न भएको जिल्ला प्रतिनिधि जुमान सिंह केसीले बताउनुभयो । जिल्ला अस्पताल बिजुवार, पुँजा स्वास्थ्य चौकी लिवासे, ओखरकोट स्वास्थ्य चौकी ढाड र प्राथमिक स्वास्थ्य केन्द्र खलंगामा छनौट शिबिर गरिएको हो । उक्त छनाेट शिविरबाट ओठ तथा तालु फाटेका सात जना बालबालिका छनाेट भएका छन । शिविरमा अन्य नौ जनालाई उपचार परार्मश सेवा दिएको केसीले बताउनुभयो ।

शिविरबाट छनाेट भएका विरामीलाई काठमाडाैँ लगेर निःशुल्क शल्यक्रिया गरिने आयोजकले जनाएको छ । साथै शल्यक्रियाको लागि जाने बिरामी तथा एक जना कुरुवालाई आउने जाने गाडी भाडा सहित खानबस्नको समेत व्यवस्था गरिएको केसीले जानकारी दिनुभयो ।

जन्मिँदै ओठ तथा तालु फाटेका बालबालिकाहरू आर्थिक अभावका कारण चेकजाँच, उपचार तथा शल्यक्रिया गर्नबाट बञ्चित हुने गरेकाले बसेर्नि छनाेट शिविर सञ्चालन गर्ने गरिएको उहाँले जानकारी दिनुभयो ।